Beasaingo CAF enpresaren sarrera blokeatu dute marka honen genozidioarekin duen konplizitatea salatzeko

Euskal Herrian, eufemismorik gabe, argi esaten dugu: CAF (Construcciones y Auxiliar de Ferrocarriles) Israelgo genozidio eta apartheidaren egiturarekin konplize zuzena da”. Horren argi adierazi nahi izan dute ekintzaileek euren salaketa. Jakina denez, CAF enpresak Israelgo Estatu sionistaren trenbide proiektuak garatzen ari da. Alde batetik, Tel Avideko metroa eta bestetik, “Jerusalem Light Rail” proiektua, “sionistentzat azpiegitura estrategikoa dena, lotzen baititu Palestina lurretan ilegalki eraikitako hainbat koloniekin”, azaldu dute.

“Palestinak, hamarkadak daramatza kolonizazio, okupazio militar eta desjabetze prozesuen menpe. Sionismoaren sorreratik gaur arte, Palestinako herriak kanporaketak, kolonoen asentamenduak (nazioarteko zuzenbidearen arabera ilegaltzat jotzen direnak) eta lurraldearen zatiketa sistematikoa pairatu ditu”, dio ekintzaileek zabaldu duten oharrak.

Berriki, NBEk ofizialki sartu du CAF Palestinaren okupazioan sionismoarekin kolaboratzen duten
enpresen zerrendan Israelen sistema kolonialari eusten dioten eta haren onuradun diren beste konpainia batzuekin batera. Francesca Albanese NBEko errelatore bereziak adierazi zuen Palestinako herriak bizi duen egoerak “apartheid erregimena eta suntsitze-prozesu sistematiko bat denak, eskatzen du nazioarteak erantzukizunarekin ekitea eta konplizitatearekin amaitzea”.

Ekintzaileek gogoratu dute Israelek trenbidearekin lotu nahi dituen kolonoen asentamenduak salatu dituela NBEk. “Asentamendu horiek nazioarteko zuzenbidea urratzen dute eta Nazio Batuen Erakundeak gaitzetsi ditu. Trena ez da garraiobide neutral bat, anexio eta apartheid tresna bat baizik”. Trenbideak kolonoen lurralde hedapena sandotzen dituela azaldu dute, eta aldiz, auzo palestinarrak isolatzen dituela arbuiatu dute. Gainera, kolonoen mugikortasuna errazten du. CAFen inplikazioa, trenbidea eraikitzetik haratago doa: mantentze lanak ere egiten ditu, eta tranbidearen funzionamenduan parte hartzen du.

“CAFen langileek ere salatu dute konplizitate hori, konpainiari erregimen genozidarekin dituen kontratu guztiak eteteko exijituz. Beraien jarrera erakusten du gardentasunetik eta barrutik egindako presioa funtsezkoa dela entitate sionistarekin harreman oro mozteko, izan ekonomikoa, industriala edo diplomatikoa”.
Azkenik, eta aldarrikapen hori indartzeko asmoz, Israelekiko lotura guztiak etetea exijitu dute. “CAFek Israelekin eta okupazioaren konplize diren enpresekin dituen kontratu guztiak, berehala eten ditzala.
Berresten gara esatean, gure tresna zilegiena eta erangikorrena BOIKOTA dela – politikoa, ekonomikoa, akademikoa, kulturala eta kirolekoa-, alegia, harreman komertzial, instituzional eta diplomatiko guztiak etetea, entitate genozidarekin hausteko”.